Este curso, que comezou o 16 de outubro e remata o 4 de decembro, é impartido por Fundación Mujeres no centro cívico Novoboandanza da Coruña. En “Coidar coidándonos” realízanse diferentes accións encamiñadas a mellorar a saúde e a calidade de vida das coidadoras informais que teñen ao seu cargo unha persoa dependente. Levaranse a cabo unha serie de talleres todos os martes a través dos cales se presta apoio psicolóxico que lles permita minimizar as problemáticas derivadas das tarefas de coidado. As temáticas que se desenvolven nos talleres son saúde e autocoidado, xestión do tempo, corresponsabilidade e planificación dos coidados, e a asertividade.

As coidadoras contan como é o seu día a día coidando da persoa dependente que teñen ao seu cargo e como se sinten ao facelo, creando novas redes de apoio entre elas.

Fundación Mujeres trata de darlle resposta ás necesidades e problemáticas que estas teñen a través de dinámicas onde se tratan os dereitos que teñen como persoas e como coidadoras.