A principios do mes de outubro, no marco do proxecto «Prevención de la Violencia de Género y mejora de la Salud Sexual y Reproductiva de las mujeres en 10 comunidades de El Viejo, Chinandega, ( Nicaragua) Fase I», cofinanciado pola Xunta de Galicia e executado por APADEIM e Fundación Mujeres, levou a cabo a recolección de datos dos casos reportados durante o trimestre de Xullo a Setembro para a súa análise e a posterior elaboración do boletín trimestral.
As fontes coas que se traballa para a recolección destes datos son: Ministerio Público, Medicina Legal, Centro de Saúde de El Viejo, Mujeres Católicas por el Derecho a Decidir, Xochild Acalth e as mulleres que fan de enlaces comunitarias, o que nos permite poder ter datos confiables da realidade do problema da violencia de xénero, nas súas diferentes manifestacións.
Os datos recolleitos seguen sendo alarmantes. Segundo a organización Mujeres Católicas por el Derecho a Decidir, até setembro deste ano houbo un total de 42 feminicidios, 2 asasinatos, 1 homicidio, 51 feminicidios en grao de tentativa, 17 asasinadas no exterior e 2 menores violadas e asasinadas. As estatísticas móstrannos a realidade que enfrontamos só polo feito de ser muller e a falta de compromiso da sociedade e do goberno para recoñecer a gravidade da violencia cara ás mulleres.
