Coidar  dunha  persoa en situación de dependencia  é  unha labor que  require  dun gran  esforzo e enfrontarse a situacións difíciles durante moito tempo, derivando frecuentemente en alteracións do estado de ánimo, e máis especificamente a depresión.

A Universidade de Santiago de Compostela puxo en marcha un proxecto cuxo obxectivo é axudar a previr a depresión nas coidadoras familiares de persoas en situación de dependencia a través da aplicación para  smartphones «Happy».

«Happy» ofrece un programa psicolóxico gratuíto baseado nunha intervención eficaz para a prevención da depresión desenvolta polo Grupo de Investigación en Saúde Mental e  Psicopatología ( GRISAMP), dirixido polo  Prof. Fernando  L. Vázquez González, formado por prestixiosos psicólogos/ as e psiquiatras das Universidades de Santiago de Compostela e da Coruña, financiado polo Ministerio de Economía e Competitividade de España.

Para acceder ao programa, as coidadoras deben cumprir os seguintes requisitos:

• Ter un  Smartphone (un teléfono móbil con conexión a internet, onde se poidan utilizar aplicacións,  p.ex.,  WhatsApp).
• Unha vez iniciado o programa, comprometerse a finalizalo (o programa dura 5 semanas, e pódese realizar comodamente en calquera horario e lugar desde o teléfono móbil), e a participar en todas as avaliacións, que terán lugar antes do programa, despois do programa, e puntualmente durante 12 meses despois da súa finalización.

Esta aplicación axudará ás coidadoras para mellorar o seu estado emocional e a previr futuras depresións, mellorando a súa calidade de vida e a da persoa que coida.

Agradecer ao CIM (Centro de Información ás Mulleres) da Coruña a colaboración para desenvolver esta actividade pola cesión de espazos.