Fundación Mujeres regresa ao concello de Ordes co Servizo de Apoio Integral a Coidadoras do medio rural.
Este é o cuarto ano que nos achegamos ao concello de Ordes para poñer en marcha o Servizo de Apoio a Mulleres Coidadoras do Medio Rural. Este concello da Mancomunidade conta sempre cun amplo número de mulleres interesadas en asistir aos talleres. Contamos, nesta edición, con 16 mulleres inscritas.
O pasado luns día 6 de outubro púxose en marcha o programa de talleres no local social, comezando polo obradoiro de Autocoñecemento e Autoestima: “Como me quero?, como me sinto?”.
A través deste obradoiro, imos traballar sobre os seguintes obxectivos:
¨ Coñecer a percepción que as mulleres teñen de si mesmas e identificar e recoñecer a percepción que os e as demáis teñen sobre elas.
¨ Tomar conciencia sobre a importancia de desenvolver unha autoimaxe e autoestima positivas.
¨ Conseguir unha visión realista sobre como somos (a través do coñecemento e aceptación das habilidades e dificultades).
¨ Analizar posíbeis aspectos que teñan influido e influan en como actuamos e nos sentimos actualmente, para quitarnos de enriba as mensaxes recibidas que temos interiorizadas e que nos perxudican.
Durante tres sesións estaremos adicadas a traballar nestes aspectos a través de dinámicas participativas e da reflexión grupal. O obradoiro prolongarase até o vindeiro luns 26 de outubro.
